ՍՈՒՐԲ ՊԱՏԱՐԱԳ ՌՈՒՀՐ ՇՐՋԱՆԻ ՀԱՅ ՀԱՄԱՅՆՔՈՒՄ

Կիրակի` 6 օգոստոս 2023-ին, Ռուհր Շրջանի Հայ համայնքում մատուցվեց հերթական Սբ. Պատարագի արարողությունը։

Պատարագիչ հոգևորականը համայնքիս հոգեւոր հովիվ տեր Վահրիճ քահանա Բաղդասարյանն էր։

Տեր հայր նախ քարոզեց` նյութ ունենալով օրվա ավետարանական հատվածը, ապա հավարտ իր քարոզի ներկա հավատացյալներին և Համայնքի վարչութանը իր երախտագիտությունը հայտնեց Սբ. Խորանի անհրաժեշտ պարագաներ (Խաչվառ, ավետարան, ծածկոցներ և այլ) ձեռք բերելու համար։

Տեր հայրը տեղեկացրեց, որ Սբ. Պատարագին գործածվող սկիհը և մաղզման նվիրել է Առաջնորդ Սերովբե Սրբազանը, որի համար Համայնքի վարչության և իր անունից որդիական երախտագիություն հայտնեց Սրբազան Հորը։

Տեր հայրը շնորհակալություն հայտնեց նաև բարեշնորհ Վազգեն սարկավագին` Սբ. Խորանը ավանդական ոճով կահավորելու անհրաժեշտ պարագաները պատրաստելու համար։

Սբ. Պատարագի և Հոգեհանգստյան արարողությունից հետո ներկաները հնարավորություն ունեցան մասնակցելու միասնական սիրո ճաշին։

Սրահում տեր հայրը ներկաներին տեղեկացրեց առաջիկա միջոցառումների, նաև այն մասին, որ սեպտեմբեր ամսից Համայնքում կգործի Կիրակնօրյա դպրոց, իսկ պատանիները և երիտասարդները հնարավորություն կունենան մասնակցելու հայկական-ժողովրդական պարի դասընթացների։

Ճաշի ավարտին Համայնքի վարչությունը և Երիտասարդաց հանձնախումբը հաճելի անակնկալ մատուցեցին տեր հորը` շնորհավորելով իր ծննդյան տարեդարձը ։

Համայնքի Փոխատենապետուհի տիկին Մադլեն Բերթիսզլյանը հանուն Համայնքի վարչության շնորհավորեց տեր հորը և իբրև նվեր փոխանցեց քահանայական գեղեցիկ լանջախաչ։

Տեր հայրը իր երախտագիտությունը հայտնեց ներկաներին` մաղթելով Աստծո անսպառ օրհնությունները։

ՀԱՄԱՅՆՔԻ ՎԱՐՉՈՒԹՈՒՆ